Shkon në 400 mijë sterlina, ose ndryshe rreth gjysmë milion euro, shifra që Manchester City ka mbledhur për bamirësi, falë një nisme që përfshin edhe tifozët me rastin e Krishtlindjeve.
E veçantë në nismën e klubit është zgjedhja e formatit dhe përfshirja e saj në rrjetet sociale.
Iniciativa e ‘Cityzens Giving’ ka faqen e saj në internet (cityzensgiving.org) dhe ka bërë një fushatë në rrjetet sociale për të afruar tifozët.
Gjatë këtyre javëve, në të gjitha pikat e shitjes së klubit ose Akademisë, gjenden kuti të mëdha me monedha blu false.
Të njëjtat monedha mund të vendosen në një nga gjashtë kutitë që u korrespondojnë 6 çështjeve të ndryshme sociale që Manchester City ka vendosur të mbështesë në 6 qytete të botës.
Në fund janë njerëzit që do të vendosin se ku do të shkojnë paratë e mbledhura për bamirësi.
Këto ndihma mund të shkojnë: për personat e papunë në Manchester; përfshirjen e të rinjve të periferive të Nju Jorkut në shkolla, nëpërmjet aktiviteteve të ndryshme sportive; socializimin e të rinjve të Melburnit; në mbështetje të punësimit të të rinjve në Mexico City; në programe për reduktimin e rrezikut nga infektimi me HIV për popullsinë e Bandungut në Indonezi dhe në një projekt për integrimin e njerëzve me aftësi të kufizuar në Pekin.
Në këtë mënyrë, Football City Group afirmon fuqinë ndërkombëtare për atë që futbolli mund të bëjë në fushat sociale.
Burimi: Revista Monitor
