15-20 euro drejt Vjenës e Milanos/ Biletat e avionëve më të lira se asnjëherë nga Rinasi, ja çmimet

157

Muajt e fundit, çmimet e biletave ajrore janë ulur ndjeshëm dhe në Shqipëri. Hyrja e dy operatorëve të mëdhenj low cost, Wizz Air dhe Easyjet, zgjerimi i destinacioneve të operatorëve ekzistues dhe shtimi i konkurrencës, ka bërë që çmimet e biletave të bien ndjeshëm.

Destinacioni që ka shënuar uljen më të madhe është Vjena. Vetëm një orë e pak fluturim, përmes Austrian Airlines, që deri në dhjetor kishte monopolin e kësaj rruge, kushtonte mesatarisht mbi 200 euro vajtje-ardhje. Nga dhjetori ka filluar fluturimet Wizz Air. Nëse kërkon me këtë linjë, mund të gjesh bileta edhe 15 euro në një drejtim, psh në datën 14 maj, apo 27 euro në 27 maj. Bileta më e shtrenjtë në një drejtim është rreth 44 euro me këtë operator, drejt Vjenës. Mesatarisht një bileta vajtje-ardhje e gjen me rreth 50-60 euro, nëse e pret disa muaj përpara.

Po me Wizz Air, i lirë është dhe Budapesti, me vajtje 20-30 euro dhe kthim 30-40 euro. Wizz Air ka nisur fluturimet dhe drejt destinacioneve italiane, ku po në muajin maj, mund të gjesh bileta drejt Milanos (Bergamo) me 15 euro vajtje dhe 24 kthim. Në qershor bileta shtrenjtohet në 25-30 euro një drejtim.

Easyjet është operatori tjetër që ka filluar fluturimet nga Rinasi. Edhe me këtë operator drejt Milanos (Malpensa) mund të gjesh bileta që fillojnë nga 19 euro, në një drejtim. Kthimi është rreth 30-34 euro, pra një biletë vajtje-ardhje mund ta gjesh me 50-60 euro. Në periudhën e verës çmimet shtrenjtohet, por sërish mbeten më të lira se më parë, me rreth 50 euro vajtje e 80 kthim në fillim gushti (kujtojmë që në verë biletat nga Italia fluturonin edhe mbi 200 euro në një drejtim). Easyjet operon me fluturime direkte dhe drejt Gjenevës, ku në maj mund të gjesh biletë vajtje me 18 euro, por kthimi është më i shtrenjtë, rreth 65 euro.