Fluks turistësh në Butrint, destinacioni i rreth 35 mijë vizitorëve në 7 muaj

17

Qyteti antik i Butrintit në Sarandë, ka shënuar në 7 muajt e parë të këtij viti një numër të lartë turistësh vendas dhe të huaj.

Referuar të dhënave zyrtare, të publikuara nga ATSH, gjatë muajit janar-korrik Butrinti u vizitua nga 34 618 turistë vendas e të huaj, një rritje me 72 % ose 14 483 vizitorë më shumë se në 2021.

Gjatë janar-korrik 2021 Butrinti u vizitua nga 20 135 vizitorë vendas e të huaj.Sa i përket të ardhurave nga biletat për mujorin janar-korrik të këtij viti janë rritur me 68.7% ose 103 01 600 lekë më shumë se e njëjta periudhë e vitit të kaluar.

Turistët në këtë vend shijojnë një itinerar interesant turistik mes rrënojave të qytetërimeve të lashta dhe peizazhit fantastik që ky vend të ofron në çdo stinë.

Butrinti sot është një kompleks arkitektonik me 15 zona të periudhave të ndryshme, nga shekulli IV para Krishtit deri në shekullin XVI pas Krishtit.