Në grupin e agrumeve, mandarinat “Made in Albania” renditen në vendin e dytë pas perimeve, për eksportet më të larta që kanë shënuar gjatë muajit dhjetor 2020.
Qendra e Eksporteve në Vlorë, bën të ditur se, “7200 tonë mandarina u eksportuan në 5 shtete, gjatë muajit dhjetorit 2020, shifër kjo 12% më shumë se në të njëjtën periudhë të vitit 2019”.
Tregjet rajonale janë tashmë destinacionet kryesore të eksportit të mandarinave shqiptare ku kryeson me sasinë më madhe Kosova, Maqedonia e Veriut ndërsa po vijon me kërkesë të shtuar edhe tregu i Serbisë, Ukrainës dhe Çekisë.
Sipas Qendrës së Eksporteve Vlorë, sasia më e lartë e eksportit ditor të mandarinave shënoi në mesin e muajit dhjetor 2020, me rreth 450 tonë, ndërkohë që eksportet mesatare ditore shënojnë 280 tonë mandarina.
