Qendra multifunksionale “Gonxhe Bojaxhi” vetëm pak ditë nga hapja është kthyer jo vetëm në një strehëz ku personat në vështirësi ekonomike mund të gjejnë mbështetje dhe një vakt të ngrohtë, por edhe një mundësi për zgjidhjen e problemeve të tyre sociale dhe shëndetësore.
Dje ajo ka pritur dhjetra qytetarë me probleme me shikimin të cilët kanë zhvilluar vizita mjekësore dhe kanë përfituar syze falas.
Kjo është bërë e mundur falë bashkëpunimit të Bashkisë Tiranë dhe Misionit Amerikan të Bamirësisë , të cilët i erdhën në ndihmë individëve në vështirësi ekonomike dhe me probleme me shikimin.
Doktorë të specializuar në këtë fushë nga SHBA ofruan përvojën dhe dijet e tyre për t’i ardhur në ndihmë dhjetra banorëve të Njësisë 4 dhe 8 që e kishin të vështirë të përballonin kostot e vizitave dhe syzeve optike.
Në Bashkinë e Tiranës aktualisht funksionojnë 7 qendra dhe mensa sociale, disa prej tyre të hapura vetëm vitin e fundit, dhe që ofrojnë shërbime të ndryshme për të gjithë banorët në kushte të vështira ekonomike dhe sociale.
