Elon Musk njoftoi se 24 orë më parë startup-i i tij “Neuralink” implantoi për herë të parë, një nga çipat e tij në trurin e një qenieje njerëzore, sipas “Quotidiano Nazionale”.
“Pajisja quhet ‘Telepathy’ dhe ju lejon të keni kontrollin e telefonit ose kompjuterit tuaj dhe nëpërmjet tyre, pothuajse çdo mjet, thjesht duke menduar”, tha Musk në X.
Përdoruesit e parë do të jenë njerëzit që kanë humbur përdorimin e gjymtyrëve të tyre.
“Imagjinoni sikur Stephen Hawking të mund të komunikonte më shpejt se një daktilografist ose një drejtues ankandi. Ky është qëllimi”, tha ai.
Gjatë një operacioni kirurgjik invaziv, implanti i quajtur ‘Link’, me madhësinë e pesë monedhave të grumbulluara, futet në trurin e pacientit.
“Pacienti po rikuperohet mirë dhe rezultatet fillestare tregojnë zbulim premtues të informacionit në tru”, njoftoi Musk.
Ambicia e Musk është të rrisë kapacitetin e trurit dhe të kurojë çrregullimet neurologjike, si ALS ose Parkinson, dhe një ditë të jetë në gjendje të krijojë një simbiozë midis njeriut dhe inteligjencës artificiale.
Vitin e kaluar “Neuralink” mori autorizimin nga Administrata e Ushqimit dhe Barnave, autoriteti rregullator i SHBA-së në fushën e terapive mjekësore, dhe filloi të rekrutonte vullnetarë për testim në fund të 2023.
/ata.gov.al
