Parku Kombëtar i Dajtit, tashmë ka të gjithë sinjalistikën e nevojshme për të gjithë turistët vendas e të huaj, të cilët do të kryejnë ecje në këmbë apo me biçiklete. Kjo është arritur, falë një projekti trepalësh sponsorizuar nga Qeveria Çeke, ajo e Sllovakisë dhe Austrisë.
Me ndihmën e grupit të alpinistëve të Dajtit, të cilët kanë punuar vullnetarisht, është realizuar vendosja e shenjave dalluese në një hapësirë prej 100 km që nis nga Mali i Dajtit deri në Bizë. Janë shënuar me bojë sipas shenjave evropiane, 25 shtigje për këmbësor dhe 8 për biçikletat malore financuar nga ambasada çeke.
