Mbajtja e mishrave të dhëmbëve si edhe e gojës në gjendje të shëndetshme bën mirë për zemrën dhe mund të jetë një nga truket edhe për t’u ndjerë më të shëndetshëm përballë Covid-19, sipas Shoqërisë Italiane të Periodontologjisë dhe Implantologjisë.
Sipas disa studimeve, larja e dhëmbëve të paktën dy herë në ditë ul gjasat e aritmive dhe dështimit të zemrës me 10%.
Terapia jokirurgjikale e periodontitit, duke zvogëluar sasinë e baktereve të pranishme, gjithashtu ul faktorët kryesorë të rrezikut kardiovaskular me 30% .
Për më tepër, parandalimi i inflamacionit të mishrave të dhëmbëve me higjienë adekuate të gojës mund të jetë gjithashtu i rëndësishëm për t’u mbrojtur nga Covid-19 pasi bakteret orale përgjegjëse për periodontitin mund të përkeqësojnë infeksionet e mushkërive ose të lehtësojnë kolonizimin e rrugëve të frymëmarrjes nga agjentë infektivë siç është Sars-Cov. -2.
Luca Landi, president i shoqatës, shpjegon se ”ata që kanë periodontit dhe i nënshtrohen terapisë jokirurgjikale për të zvogëluar sasinë e baktereve patogjene të pranishme në xhepat periodontale gjithashtu zvogëlojnë numrin e baktereve virulente në gjak që do të kontribuonte në formimin e ateromave, pllaka që çojnë në degjenerim të arterieve”.
“Terapia periodontale gjithashtu çon në një reduktim të proteinave C reaktive, fibrinogjenit dhe kolesterolit të oksiduar LDL të cilat janë elementë të tjerë të përfshirë në një rritje të inflamacionit të enëve të gjakut dhe në gjasat e aterosklerozës”, shtoi Landi.
