TIRANE – Sheshi Skënderbej për tre ditë me radhë është kthyer në zonën më bio të kryeqytetit, ku mbi 40 agrobiznese dhe prodhues nga Shqipëria, Kosova dhe Maqedonia, ekspozojnë produktet e tyre për qytetarët, duke qenë më pranë konsumatorëve dhe duke i njohur ata më në detaj me prodhimet lokale.
Produktet janë të një game të gjerë, nga bimët mjekësore, vajrat esenciale, fruta dhe perime të përpunuara, produkte bulmeti, artizanale etj. Ndërkohë që interesi nga konsumatorët ka qenë i lartë.
Kjo është një mundësi për të gjithë qytetarët për të konsumuar shqip, për të përqafuar produktet vendase dhe për të mbështetur rritjen bizneseve dhe prodhuesve shqiptarë.
Panairi “Agro Fest” tashmë është kthyer në traditë, pasi organizohet çdo vit dhe është një pikëtakimi midis konsumatorëve dhe prodhuesve, si dhe mundësi për bizneset për të lidhur bashkëpunime me njëri-tjetrin.
