Qendra për Hapje dhe Dialog (COD) çel në mjediset e sallës së ekspozitave “Thimi Mitko”, Korçë, ekspozitën shëtitëse “Remains of Paranoia”, nga autori dhe fotografi gjerman Alfred Diebold, i cili sjell për publikun fragmente historike nga periudha e paranojës komuniste në Shqipëri.
Fotografi të avionëve luftarakë, nëndetëse, tanke, bunkerë, tunele dhe instalime ushtarake të dokumentuara nga Diebold, janë rezultat i një periudhe historike me kontekste të caktuara jo vetëm politike, por edhe social-kulturore.
Zonat e Pashalimanit, Porto Palermos, Gjadrit, Pocestës, Kuçovës, Qafë-Thanës dhe ishulli i Sazanit, të cilat kanë qenë dhe janë rreptësisht të ndaluara dhe të rrezikshme për publikun, prezantojnë një dimension material të rëndësisë thelbësore të objekteve, mjediseve natyrore dhe atyre të krijuara nga vetë njeriu.
Ekspozita “Remains of Paranoia” do të qëndrojë e hapur për publikun nga data 21 mars 2024 – 26 prill 2024.
/ata.gov.al
