Qyteti i një mbi një dritareve me bukuritë e tij vijon të preferohet nga turistët e shumtë vendas e të huaj edhe gjatë stinës së vjeshtës.
Vetëm në muajt shtator dhe tetor kalanë e Beratit e kanë vizituar rreth 20 715 turistë vendas e të huaj.
Turistët e huaj janë kryesisht polakë, rusë, çekë, gjermanë, holandez etj. Krahasuar me vitin e kaluar numri i turistëve është rritur ndjeshëm. Vjet në shtator-tetor kalaja u vizitua nga 4500 turistë
Në të gjithë qarkun e Beratit numërohen rreth 486 monumente kulture dhe kjo ka një impakt të jashtëzakonshëm, sidomos në rritjen e fluksit të turizmit kulturor sidomos vitet e fundit.
Kalaja e Beratit është një nga monumentet më të mëdha historike të Ballkanit, një fortesë e madhe që sundon mbi lumin Osum. Kalaja është ngritur sipas një plani në formë trekëndëshi. Kjo kala, po të shihet nga poshtë, duket si pjesë e kodrës.
Kulla e hyrjes së brendshme është e bërë nga blloqe guri, që u përkasin fortifikimeve ilire, të cilat janë ndërtuar në shekujt IV-II para Krishtit. Maja e kodrës është e rrethuar me një mur të jashtëm periferik me 24 kulla. Në brendësi të kësaj kalaje ndodhen rreth 14 kisha, të cilat e kanë bërë mjaft të dëgjuar atë.
