Kalaja e Gjirokastrës, simboli i qytetit të njohur si “qyteti i gurtë”, përmendet për herë të parë si kështjellë dhe qytet në vitin 1336. E vendosur mbi një kodër 370 metra mbi nivelin e detit, kalaja mbetet një pikë kyçe e turizmit dhe kulturës në jug të Shqipërisë.
Statistikat e Drejtorisë Rajonale të Trashëgimisë Kulturore tregojnë një rritje prej 20.73% të vizitorëve gjatë vitit 2024, duke arritur në 262,972 vizitorë. Kalaja tërheq turistë vendas dhe të huaj, të cilët mahniten nga arkitektura e saj dhe peizazhet që ofron.
Përveç të qenit një destinacion turistik, kalaja shërben si hapësirë për organizimin e koncerteve, spektakleve dhe panaireve kulturore. Ajo është një pikë e rëndësishme në guidat turistike, duke kontribuar në promovimin e Gjirokastrës, qytet i mbrojtur nga UNESCO.
E pozicionuar në zemër të qytetit të Gjirokastrës, kalaja mbart jo vetëm historinë, por edhe një atmosferë unike që e bën të paharrueshme për ata që e vizitojnë.
Referenca: ata.gov.al
