Një mace e veshur me një jelek verdhezi sigurie, kalon pranë rojave të sigurisë, të rreshtuar jashtë një ndërtese zyrtare në Filipine, në pritje të ”udhëzimeve” për turnin e saj.
Conan, një mace endacake gjashtëmuajshe, iu bashkua ekipit të sigurisë në Qendrën e Korporatës Botërore në kryeqytetin e Filipineve, Manila, disa muaj më parë.
Ajo është një nga macet me fat e adoptuar jozyrtarisht nga oficerët e sigurisë në qytet, ku mijëra mace jetojnë në rrugë.
Megjithëse maceve u mungojnë aftësitë e sigurisë së qenve dhe priren të flenë në punë, rojat e sigurisë – të cilët punojnë 12 orë në ditë dhe mërziten disi gjatë turnit të tyre – shijojnë mirësinë dhe shoqërinë e tyre.
Conan u shpëtua kur ishte disajavëshe nga një pastruese, e cila e gjeti atë duke rënkuar në parkingun e pallatit.
“Më heq stresin”
Gardianët e dëshpëruar, të cilët donin diçka për të gjallëruar turnet e tyre, vendosën ta ”emëronin” në këtë detyrë.
“Nëse Conan nuk është këtu, unë nuk jam i motivuar”, i tha AFP-së Aljon Aquino, 30 vjeç.
“Më largon stresin”, thekson ai.
Fotot e Conan janë shpërndarë mijëra herë në Facebook.
Ajo është një nga dhjetëra macet që jetojnë në Qendrën e Korporatës Botërore, një ndërtesë zyrtare dhe shitjesh me pakicë, ku lejohen edhe të bredhin.
Duke bërë një jetë të mirë, Conan, megjithatë, tregon pak entuziazëm për të ndihmuar ”kolegët” e saj në detyrat e tyre, të tilla si kërkimi i çantave të klientëve dhe punonjësve në hyrje të ndërtesës.
Ajo preferon shumë të pushojë para kafenesë aty pranë.
“Ndonjëherë njerëzit e përqafojnë sepse është shumë e këndshme”, thotë Aquino.
/ata.gov.al
