Tirana do të mikpresë për të dytin vit radhazi konkursin kombëtar të teknologjisë, “BiblioTech”, një aktivitet maratonë ky për fëmijë dhe të rinj për t’i inkurajuar ata të zhvillojnë ide teknologjike dhe inovative si dhe t’i përgatisë për vendin e punës të së ardhmes duke rritur aftësitë e tyre digjitale dhe të sigurisë në internet.
Në datat 6,7 dhe 8 maj në Parkun Olimpik,, fëmijë të moshave 8-18 vjeç do të kenë mundësinë që të zhvillojnë koncepte teknologjike dhe inovative përmes argëtimit, mësimit me metoda tërheqëse dhe interesante dhe nëpërmjet prezantimeve.
Aplikantët do të marrin përvoja mbi orientimin dhe zgjidhjen e problemeve përmes një programi tre ditor të drejtuar nga mentorë, duke ndihmuar dhe inkurajuar fëmijët dhe të rinjtë të sjellin në jetë idetë e tyre.
Në këto tri ditë frymëzuese, fëmijët dhe të rinjtë do të nxisin dhe udhëheqin konceptualizimin e ideve teknologjike. Ata do të angazhohen në përvoja teknologjike, ndërtimin e besimit, rritjen e njohurive të tyre dhe zhvillimin e aftësive dhe shprehive të të mësuarit.
Qëllimi i kësaj sfide është rritja dhe zgjerimi i interesit të fëmijëve dhe të rinjve për teknologjinë, inovacionin, modelimin e qendrave sociale, të mirat digjitale dhe mbrojtjen online, ndërsa do të mësojnë nga njëri-tjetri të zgjidhin problemet në ekip.
Çmimet: Sfida do të ketë 3 fituesit e parë për grupmoshat e mëposhtme:
1. Vendi i parë për inovatorët 8-11 vjeç
2. Vendi i parë për inovatorët 11-15 vjeç
3. Vendi i parë për inovatorët 15-18 vjeç
