Bonbonet janë të mrekullueshme në të gjitha mënyrat e përgatitjes së tyre. Janë ndër ëmbëlsirat më të preferuara të shqiptarëve, sidomos para viteve ’90.
Sot recetat e tyre janë pasuruar me përbërës të tjerë duke e lartësuar edhe më tej shijen e tyre fantastike plot ëmbëlsi.
AgroWeb.org sugjeron më poshtë dy receta fantastike të përgatitjes së bonboneve me çokollatë të kombinuara me arra.
Dy Receta të Bonboneve me Çokollatë
Bonbonat me Çokollatë
- Përbërësit
- 250 gr çokollatë
- 200 gr pana/krem qumështi
- Vanilje
- Lajthi i grirë imët, copëza çokollate ose pluhur kakao
Përgatitja
Në një tenxhere shtojmë kremin e qumështit dhe e vendosim të ngrohet në zjarr.
Sapo të ngrohet, e heqim nga zjarri dhe shtojmë çokollatën bashkë me vaniljen.
I përzjejmë mirë pa ndalur derisa çokollata të shkrijë dhe e gjithë masa të bëhet e njëtrajtshme.
E vendosim në frigorifer të ftohet duke e lënë për 2 ose 3 orë.
Më pas e nxjerrim dhe me ndihmën e një luge ndajmë bonbonat në forma të rrumbullakëta si toptha duke përdorur pëllëmbët e duarve.
Në fund, sipas dëshirës mund t’u hidhni sipër lajthi ose arra të grira hollë, pluhur kakao ose çokollata të thërmuara.
I vendosim sërish në frigorifer para se t’i servirim.
Bonbonet me Arra dhe Çokollatë
Përbërësit
- 500 gr sheqer
- 150 gr arra
- 100 ml ujë
- 300 gr krem qumështi
- 200 gr çokollatë
- 50 gr gjalpë kakao
Përgatitja
Si fillim grijmë hollë arrat. Në një enë tjetër hedhim sheqerin, ujin dhe krmein e qumështit, i përzjejmë mirë dhe i lëmë në zjarr që të vlojnë derisa masa të trashet si brumë.
E heqim nga zjarri dhe e hedhim në enën ku kemi arrat e grirë hollë, e kthejmë gjithë masën në tavolinën e gatimit dhe e lëmë të ftohet.
Këtu nisim të shtypin masën duke e punuar si brumë, pastaj e hapim mbi tavolinë në formën e një pete të trashë 1-2 centimetra.
E presim në forma katrore dhe i përgatisim bonbonat në formën e topthave të vegjël.
Të gjitha topthat i lyejmë në fund me çokollatën e shkrirë. I radhisim të gjitha mbi një letër kuzhinë dhe i lëmë të ftohen dhe forcohen në frigorifer.
Përgatitja e çokollatës
Në një enë të vendosur mbi një mjedis të ngrohtë që të lejojë shkrirjen e çokollatës punojmë copat e çokollatës me gjalpin e kakaos derisa e gjithë masa të bëhet e njëtrajtshme dhe të jetë e lëngshme për të ngjyer bonbonat.
/agroweb.org
