“Información”: Shqipëria – zbuloni plazhet spektakolare dhe historinë e pasur

4

Organizoni një udhëtim në plazhet më të mira me rërë dhe ujërat e pastra kristal në kontinentin e vjetër me shumë më pak shpenzime nga sa e imagjinoni, shkruan Patricia Páramo në të përditshmen spanjolle “Información”.

Deti i Karaibeve është një nga pikat e referimit në botë për plazhet idilike me ujëra të pastra kristal.

Megjithatë, nuk është e nevojshme të udhëtoni kaq larg për të shijuar zonat ranore të këtij lloji. Shumë më pranë, ju mundësohet një alternativë tjetër, që nuk ka asgjë për t’u pasur zili nga vende si Republika Domenikane, Kuba apo Porto Riko.

Kjo është Shqipëria, një nga vendet e panjohura dhe në të njëjtën kohë më magjepsëse në kontinentin e vjetër. Jo më kot, ekspertët e udhëtimeve e njohin si “Karaibet e Europës” dhe nuk mungojnë arsyet për këtë pseudonim.

Shqipëria është një destinacion që befason me bukurinë e saj natyrore, plazhet e saj spektakolare dhe historinë e saj të pasur.

Ky vend, i vendosur në Gadishullin Ballkanik, ofron gjithçka, nga plazhet e pacenuara dhe peizazhet malore deri te kështjellat dhe qytetet plot histori.

Udhëtimi në Shqipëri: çfarë duhet të dini përpara se të shkoni

Koha më e mirë për të vizituar Shqipërinë është midis majit dhe shtatorit, kur moti është i ngrohtë dhe me diell, ideal për të shijuar plazhet.

Megjithatë, nëse preferoni të shmangni turmat, udhëtoni në maj ose shtator.

Për sa i përket dokumentacionit të nevojshëm, shtetasit spanjollë mund të shkojnë në Shqipëri me pasaportë dhe pa vizë.

Sigurohuni që pasaporta juaj të jetë e vlefshme për të paktën gjashtë muaj pas datës së hyrjes tuaj në vend.

Nga ana buxhetore, Shqipëria është një destinacion relativisht i përballueshëm.

Megjithatë, është e rëndësishme të përcaktohet një buxhet për të mbuluar akomodimin, ushqimin, transportin dhe aktivitetet.

Kostoja e jetesës është më e ulët në krahasim me destinacionet e tjera evropiane.

Ku të qëndroni në Shqipëri

Tirana, kryeqyteti i Shqipërisë është një pikënisje e mirë, me mundësi akomodimi për të gjitha buxhetet.

Tirana ofron një ndërthurje të kulturës, historisë dhe jetës së natës.

Ndalesa e radhës në udhëtimin tuaj mund të jetë Saranda, ideale për adhuruesit e plazhit.

Saranda ndodhet në bregdetin jugor dhe është një bazë e mirë për të eksploruar plazhet e afërta dhe sitin arkeologjik të Butrintit të Trashëgimisë Botërore të UNESCO-s.

Ju mund ta përfundoni udhëtimin tuaj duke fjetur një natë në Gjirokastër.

E njohur si “Qyteti i gurtë”, Gjirokastra është e famshme për arkitekturën osmane të ruajtur mirë.

Nëse jeni të interesuar për kulturën dhe historinë e saj, mos e humbisni atë.

Si të lëvizni nëpër Shqipëri

Marrja me qira e një makine është një nga mënyrat më të mira për të eksploruar Shqipërinë, duke ju lejuar të aksesoni vende më pak turistike.

Një tjetër mundësi është transporti publik, duke përfshirë autobusët dhe furgonat (minibusët), të cilët lidhin qytetet dhe qytezat e mëdha.

Ky opsion është më i ngadalshëm, por do t’ju lejojë të ndërveproni me njerëzit vendas dhe të shijoni peizazhet nga një këndvështrim tjetër.

Çfarë duhet të shihni në Shqipëri

Udhëtimi nis në Tiranë, kryeqytetin e vendit. Aty mos humbisni sheshin Skënderbej, në zemër të qytetit, Muzeun Historik Kombëtar dhe lagjen shumëngjyrëshe të Bllokut, i njohur për jetën e tij të natës.

Më pas shkoni në Berat, “qyteti i një mijë dritareve” dhe zbuloni arkitekturën e tij unike të njohur nga UNESCO.

Parku Kombëtar i Llogarasë është vendi ideal për adhuruesit e natyrës dhe ecje.

Parku ofron pamje mahnitëse të detit Jon dhe Rivierës Shqiptare nga lartësitë e tij.

Së fundi, ia vlen të vizitohet edhe Butrinti, një vend arkeologjik me rrënoja që datojnë nga periudha të ndryshme, duke përfshirë ato greke, romake dhe bizantine, në një mjedis spektakolar natyror.

Riviera Shqiptare

Riviera shqiptare është një nga xhevahiret më të mëdha të vendit. Këtu, deti Jon lag brigje ëndërrimtare dhe ofron një peizazh të pashembullt.

Një nga vendet më të shquara është Ksamili, i famshëm për ishujt e tij të vegjël të arritshëm me not ose me varkë, ku ujërat e bruztë dhe rëra e bardhë e butë ju ftojnë të pushoni dhe të shijoni relaksin.

Jo shumë larg, plazhi i Dhërmiut shtrihet me mjedisin e tij të mrekullueshëm të maleve dhe ujërave blu, duke tërhequr si kërkuesit e qetësisë ashtu edhe adhuruesit e aktiviteteve ujore.

Për ata që duan një ndërthurje të historisë me kënaqësinë, Himara ofron jo vetëm plazhe të bukura, por edhe një qytet të vjetër të bukur plot histori.

Udhëtimi në Shqipëri

Shqipëria shquhet për mikpritjen dhe dashamirësinë e njerëzve të saj ndaj të huajve.

Vendi ka punuar shumë për të përmirësuar infrastrukturën e tij turistike dhe sigurinë vitet e fundit, dhe shumë udhëtarë e shohin Shqipërinë si një destinacion të sigurt dhe mikpritës.

Këshilla për ta bërë udhëtimin tuaj në Shqipëri të paharrueshëm

Për ta bërë të paharrueshëm udhëtimin tuaj në këtë cep të Ballkanit, ju rekomandojmë të mësoni disa fraza në shqip.

Kjo do t’ju lejojë të lidheni më shumë me vendasit. Gjithashtu, njihuni me lekun, monedhën vendase dhe respektoni zakonet dhe traditat e tij.

Së fundi, nëse keni kohë, eksploroni përtej destinacioneve turistike të rekomanduara.

Zhytuni në një qytet të vogël jashtë zonës turistike të rrahur, dhe mësoni se si është të jetosh vërtet atje. Do të jetë përvoja më autentike e udhëtimit.

/ata.gov.al