Muzeu Historik Kombëtar është i përkushtuar për të mbrojtur të drejtat e Personave me Aftësi të Kufizuara pasi beson se qasja dhe përfshirja e tyre në shërbime, në jetën publike, kulturore e politike është një e drejtë themelore.
Ky muze në bashkëpunim me Institutin e Nxënësve që nuk Shikojnë “Ramazan Kabashi”, organizuan veprimtarinë me titull “Muzeu i Prekshëm”. Ky muze ishte pranë nxënësve që nuk shikojnë, pranë institutit ku ata jetojnë.
“Muzeu i Prekshëm” ishte i përbërë nga riprodhime objektesh prej balte, veshje etnografike, vegla muzikore, si dhe nga Figurat e Prekshme (me reliev) për personat me aftësi të kufizuar në shikim. Në fund të aktivitetit, të pranishmit ndoqën një dokumentar mbi prodhimin e poçerisë dhe qeleshes, dy nga tradita të trashëguara ndër breza midis shqiptarëve.
