Viti 2024 do të shënojë dy momente të rëndësishme për infrastrukturën rrugore, fillimisht me dorëzimin e tunelit të Llogorasë, për të cilin kanë nisur punimet në nëntor të 2021-shit dhe segmentit Thumanë-Kashar, një nga akset e rëndësishme të Korridorit Blu, që për shkak të volumeve të trafikut nga ngarkesa që ndodh në Fushë Kruje apo nyjën e Rinasit, ka bërë që të ndjehet nevoja për të gjetur një zgjidhje.
Në muajin dhjetor, qeveria parashikon përfundimin e Rrugës së Arbrit, një nga investimet më të rëndësishme për modernizimin e infrastrukturës rrugore të vendit. Ajo do të shkurtojë në mënyrë të ndjeshme lidhjen e Dibrës me Tiranën, duke ndikuar ndjeshëm në zhvillimin e zonave në të cilën kalon.
Po ashtu, do të përfundojnë edhe të gjitha lotet e Unazës së Madhe të Tiranës, një segment prej 29 kilometrash. Ndërtimi i saj do të bëjë të mundur shpërndarjen e trafikut, si dhe do të krijojë mundësi të reja hyrjeje për në kryeqytet.
Janë një sërë aksesh rrugore si Elbasan- Qafë Thanë, faza e parë dhe e dytë, Orikum-Dukat, Palasë-Dhërmi, rruga Korçë-Ersekë, rruga lidhëse e Aeroportit Ndërkombëtar të Vlorës me autostradën Fier-Vlorë, që pritet të dorëzohen brenda 2024-ës.
/ata.gov.al
