Një tjetër ambjent i gjelbëruar, një park çlodhës i shtohet qytetit të Elbasanit, duke krijuar një atmosferë ndryshe në orët e pasdites në qytet, dhe që ka përcjellë një impakt ndryshe në ripërtëritjen urbane të qendrës së qytetit të Elbasanit. Bëhet fjalë për parkun më të ri, në një nga qendrat e qytetit, ku dikur ngrihej busti i “ Aqif Pashës”, nga edhe ka marrë emërin parku.
Parku “ Aqif Pasha”, përcjell një dekor ndryshe në qytet, edhe pse i krijuar rishtaz, kanë qenë të shumtë qytetarët që e frekuentojnë, por nuk kanë munguar edhe turistët, të cilët pasi shijojnë gjelbërimin dhe relaksimin, kanë mundësi të njihen edhe me gjurmë të historisë së këtij qyteti, që ndodhen brenda këtij parku sa turistik aq edhe relaksues. Mozaiku paleokristian i zbuluar vite më parë nën kujdesin e kreut të bashkisë, çezma e vjetër, rrapi që është edhe monument kulture, si edhe Muzeu Etnografik shumë pranë tij, janë kthyer në objekte të blicave fotografikë jo vetëm të të rinjve që pushojnë në këtë park por edhe të turistëve të huaj.
