Muaji nëntor është shpallur muaji i kulturës shqiptare në qytetin e Parmës në Itali.
Shoqata “Scdanderbeg” e emigrantëve shqiptarë të këtij qyteti, në bashkëpunim me Bashkinë e Parmës ka organizuar një program të ngjeshur eventesh kulturore e artistike që do të kulmojnë në 28 Nëntor në Festën Kombëtare të Flamurit.
Kurse të mësimit të gjuhës shqipe, ekspozita fotografike, një spektakël kulturor, seminare letrare e shkencore do të pasurojnë përgjatë këtij muaji, jetën artisitke e kulturore të qytetit të Parmës duke bashkuar në një atmosferë festive banorët e tij me komunitetin e emigrantëve shqiptarë.
Për mediat lokale këshilltarja e bashkisë së Parmës znj.Nicoleta Paci, shprehet se “muaji i kulturës shqiptare festohet prej disa vitesh në qytetin e Parmës nën sponsorizimin e bashkisë së qytetit. Jemi të vetëdijshëm, thotë ajo që iniciativa të tilla inkurajojnë perspektivën e një qyteti me mundësi gjithnjë e më shumë integruese e gjithëpërfshirëse:”
Me mjaft interes pritet ekspozita me fotografitë e së përditshmes “Gazeta di Parma” e cila gjatë vitti 1912 ka përcjellë në faqet e saj informacione mbi shpalljen e pavarësisë së shtetit shqiptar.
