Skema Kombëtare e Mbështetjes në Bujqësi 2022, do të subvencionojë fermerët e serrave me pagesa direkte deri në vlerën e 600,000 lekëve për dy sezone të mbjellash.
Agjencia e Zhvillimit Bujqësor dhe Rural, (AZHBR) bën të ditur se, subvencionimi nga shteti do të jetë me pagesë fikse për të mbuluar kostot e rritura të prodhimit nga ndryshimi i çmimeve të inputeve bujqësore, ndërkohë që në mbështetje të fermerëve, do të jetë përsëri këtë vit edhe skema e naftës falas.
Skema Kombëtare e Mbështetjes në Bujqësi 2022, adreson një buxhet 3.2 miliardë lekë që do të disbursohet brenda këtij viti për fermerët.
Skema përfshin pagesat direkte për fermerët nëpërmjet aplikimeve nga e-Albania, sipas parimit për zero dorëzim dokumentacion. Vetëm për fermerët që shpallen fitues iu kërkohet dokumenti origjinal për certifikatën e pronësisë.
Në fokus të skemës kombëtare janë edhe subvencionet që për herë të parë do të mbështesin sektorin e peshkimit, krahas sektorëve të tjerë që janë mbështetur tradicionalisht.
