Me 600 km/h, një shpejtësi marramendëse që e bën më të shpejtin në botë, treni i ri që sapo debutoi në Kinë nuk duket sikur ecën, por sikur pluskon në ajër falë një fushe elektromagnetike që e bën praktikisht të rrëshqasë mbi shina. I prodhuar nga kompania shtetërore, China Railway Rolling Stock Corporation, ai thuajse nuk dëgjohet kur kalon – kaq të ulët e ka nivelin e ndotjes akustike, ndersa kërkon më pak mirëmbajtje sesa trenat e tjerë të shpejtësisë së lartë.
Një prototip i këtij treni i ishte paraqitur medias në 2019-tën. Hekurudhat e shpejtësisë së lartë gëzojnë perparesi në Kinën që synon t`i lidhë me tren shumicën e qyteteve të saj kryesore, me qëllimin të reduktohet koha dhe shpenzimet e nevojitura për të udhëtuar në vendin me popullsinë më të madhe në botë.
Aktualisht, një tren mesatar i shpejtësisë së lartë atje mund të lëvizë me rreth 350 km / orë, ndërsa avionët fluturojnë me 800-900 km / orë. Trenat si ky i prezantuar së fundi shpresohet se do të arrijnë të mbushin hapësirën kritike mes këtyre të dyjave.
