Ministria e Financave ka publikuar për konsultim publik projektudhëzimin e ri “Për zbatimin e marrëveshjeve për shmangien e tatimit të dyfishtë dhe parandalimin e evazionit fiskal”.
Dokumenti sjell disa risi që kanë të bëjnë kryesisht me harmonizim me legjislacionin e brendshëm mbi tatimet direkte dhe konkretisht ligjin e ri “Për tatimin mbi të ardhurat” miratuar në mars 2023, përditësimin me modelin e marrëveshjes së vendit tonë me modelet e fundit të OECD dhe OBK, si edhe harmonizimin me procedurat e parashikuara dhe detyrimet që lindin nga konventat dhe marrëveshjet ndërkombëtare ku Shqipëria është bërë palë.
Udhëzimi i ri parashikon lehtësim të procedurave që duhet të zbatohen nga tatimpaguesit për zbatimin e marrëveshjeve për eliminimin e Tatimit të Dyfishtë, e cila synohet të realizohet nëpërmjet zëvendësimit të “Procedurës së Aplikimit” që zbatohet aktualisht dhe pritet miratimi nga DPT, me “Procedurën e Njoftimit të Administratës Tatimore”, pa pritur miratimin paraprak të Administratës Tatimore.
Për efekt kontrolli, aplikimet e tatimpaguesve në kuadër të zbatimit të marrëveshjeve do i nënshtrohen në vijim procedurës së vlerësimit të riskut dhe do kontrollohen nga strukturat e auditimit të Drejtorive Rajonale.
Parashikohet thjeshtim i dokumentacionit dhe formularëve që tatimpaguesi duhet të dorëzojë në Administratën Tatimore, me qëllim argumentimin e zbatimit të dispozitave të Marrëveshjeve.
Zëvendësim i procedurës së dorëzimit manual të dokumentacionit me ngarkimin elektronik të tyre, me qëllim reduktimin e kostove dhe kohës së tatimpaguesit.
Pasi t’i nënshtrohet procedurës së konsultimit publik, projektudhëzimi i ri, pritet të hyjë në fuqi, me t’u miratuar me urdhër të Ministrit të Financave.
/ata.gov.al
