Rasti i Charlit, 23-vjeçarit nga Bostoni, që larg Amerikës zgjodhi Shqipërinë për të punuar, është krejt i veçantë.
Si pjesë e Korpusit të Paqes, Charli aplikoi fillimisht të vinte në Shqipëri, dhe prej muajit Prill punon si mësues i anglishtes në shkollën 9-vjeçare “Halit Uruçi” të Belshit.
“Do të jem në Belsh për 2 vite, më parë kam jetuar në Librazhd. Fillimisht kisha kureshtje për rajonin e Balkanit, kulturën dhe historinë. Nuk e dija se çfarë më priste në Shqipëri, kisha pare vetëm disa foto në internet. Tani ndihem si në shtëpi, njerëzit janë kaq miqësor, kështu që nuk ishte e vështirë të integrohesha”.
Të rinjtë shqiptarë i vlerëson për zgjuarsinë dhe këmbënguljen, megjithatë emigracionin e quan jo një zgjidhje për ta.
“Fëmijëve duhet t’ju behet e qartë që kur janë të vegjël se mund të jenë të suksesshëm dhe të kenë një karrierë të pasur edhe në Shqipëri, jo vetëm larg saj. Ky vend është i bukur dhe i pasur, duhet investim, ndërsa të rinjtë duhen motivuar”.
Ashtu si Charli, janë mbi 14 mijë të huaj që kanë zgjedhur të jetojnë e punojnë në Shqipëri. Sipas INSTAT, 14.162 të huaj morën leje qëndrimi në Shqipëri gjatë 2018, duke shënuar një rritje me me 9,7 %, krahasuar me 2017./Klan
