Organizmi ynë është studiuar prej mijëra vitesh, por edhe sot përgjigjet për këtë pyetje mund të jenë të ndryshme.
”78? 283? 315 apo triliona nëse numëroni çdo nerv të vetëm”, shkruan focus.it.
”Sasia e organeve brenda trupit tonë varet nga mënyra se si i numërojmë ato”, shpjegon Lisa M.J. Lee, profesore e asociuar e biologjisë qelizore dhe zhvillimore në Universitetin e Kolorados në Denver.
”Në përgjithësi, janë koleksione indesh që punojnë së bashku drejt një qëllimi të përbashkët, secili duke siguruar një funksion për performancën ose mbijetesën e njeriut. Megjithatë, vetëm pesë janë absolutisht të nevojshme për të jetuar: truri, zemra, mëlçia, të paktën një veshkë dhe të paktën një mushkëri”, thekson Lee.
Humbja e funksionalitetit të plotë të njërit prej këtyre organeve çon në vdekje.
Në vend të kësaj, trupi i njeriut është në gjendje të mbijetojë pa shumë pjesë të tjera, ose me ndihmën e pajisjeve mjekësore për të zëvendësuar një element që nuk funksionon.
Llogaritja e numrit të organeve është pra në lidhje me mënyrën se si ato numërohen, por mund të varet edhe nga personi që e kryen atë: shpesh merret parasysh numri i përgjithshëm prej 78, duke përfshirë organet vitale, gjuhën, stomakun, tiroiden, uretrën, pankreasin dhe shumë organe të tjera të vetme ose të çiftëzuara.
Përveç kësaj, ka kocka dhe dhëmbë, të cilët numërohen vetëm një herë.
Megjithatë, anatomistët i përcaktojnë organet ndryshe: nëse indet studiohen në një nivel mikroskopik, lista bëhet më e gjatë se studimi i asaj që është e dukshme me sy të lirë.
Sipas Lee, kur lloje të ndryshme të indeve bashkohen dhe funksionojnë së bashku, ky është një organ.
/ata.gov.al
