Imazhet e fëmijëve, që nxirren me pizhame nga rrënojat, duart e vogla me pluhur që zgjaten për ndihmë nga blloqet e betonit, dhe prindërit që qajnë mbi trupat e pajetë të vogëlushëve që nuk ja dolën, po mallëngjejnë botën dhe po dëshmojnë përmasat e katastrofës që preku Turqinë dhe Sirinë, të hënën e 6 shkurtit. Menjëherë sapo lëkundja e frikshme kthehu mijëra banesa në hi, fjala e parë që thanë shumica e të mbijetuarve ishte: Fëmijët…të shpëtojmë fëmijët…”
Ishin të shumtë të miturit që u nxorën të gjallë nga rrënojat, dhe të vetmit që u rrëmbyen buzqëshje dhe lot gëzimi, qytetarëve të mbledhur pranë pallateve të kthyer në gërmadha.
“Zoti është i madh”, thirri një pjesëtar i Helmetave të Bardha në Jindires të Sirisë, teksa mes brohorimave nxorën të gjallë një vogëlushe të bllokuar në blloqet e betonit.
Fytyra ishte e mbuluar me pluhur, dhe trupi i zhytur në rrënoja deri në kraharor, por ekipet e kërkim-shpëtimit thanë se nuk ishte e plagosur rëndë…“Babai yt është këtu, mos u frikëso. Noor, të lutem më shiko. Fliti babait tënd…shihe…ja ku është.. Zot faleminderit që e shpëtove…”.
Me brohorima është pritur edhe nxjerrja e një djali të bllokuar në rrënojat e pallatit ku jetonte në Siri. Video emocionuese edhe ajo që tregon momentin kur një vogëlushe me pizhame arrin të dalë e gjallë nga pirgu i betonit që e kishte zënë sipër. Bebe mrekullie është quajtur foshnja e lindur nën rrënoja në qytetin e Alepos në Siri, ndërsa nëna thuhet të ketë vdekur menjëherë pas lindjes.
/a2news.com
